Nofel Steddfod i'r Steddfod
Nid yn aml yr ydym yn cael llyfr ar gyfer wythnos yr Eisteddfod sydd yn gwbl berthnasol i'r digwyddiad ei hun.
Eleni, fodd bynnag, mae nofel ddiweddaraf Lleucu Roberts yn ymwneud â dau gwpwl sy'n aros ar faes carafanau Steddfod Y Bala.
Yn Y Ferch ar y Ffordd mae'r wraig yn fenyw barchus hunandybus sy'n hyfforddi partïon cerdd dant a llefaru ond ei gŵr â mwy o ddiddordeb mewn meddwi na chystadlu.
"Cawn ddigwyddiadau llawn hiwmor wrth dreulio wythnos yn y Maes Carafanau yng nghwmni'r cwpwl, a chwpwl arall sy'n hen ffrindiau iddynt, ond wrth i'r atgofion lifo'n ôl mae yna greithiau o'r gorffennol yn dod i'r wyneb," meddai Lefi Gruffudd o Wasg y Lolfa sy'n cyhoeddi'r llyfr sy'n cael ei ddisgrifio fel un "ymddangosiadol ysgafn" ond yn cynnwys "elfennau difrifol a sinistr".
"Mae'r nofel yn llawn hiwmor a dychan fydd yn siŵr o daro tant gyda phawb fydd yn heidio i'r Bala yn eu carafannau, gydag un llygad wedi ei hoelio ar weithgareddau'r Pafiliwn a'r llall yn crwydro i far Brains, meddai Lefi.
Mae Lleucu Roberts yn prysur ennill ei phlwyf fel awdur gyda'i nofel Annwyl Smotyn Bach wedi ennill un o wobrau Tir na Nog eleni.
Ac i'r rhai hynny sy'n ecio tipyn o dw - neu am rywbeth i'w wneud heblaw eistedd yn eu carafan yn Y Bala - bydd disgwyddiad i nodi cyhoeddi'r nofel ar Faes C nos Sul y Steddfod am 7:30.
Mae'n debyg mai'r nofel ddiwethaf i'w cyhoeddi yn ymwneud yn uniongyrchol â'r Eisteddfod Genedlaethol oedd Un Diwrnod yn yr Eisteddfod gan Robin Llywelyn a enillodd Wobr Goffa Daniel Owen yn yng Nghasnewydd 2004.
Nofel eisteddfodol arall, sydd siŵr o fod hen allan o brint erbyn hyn, yw nofel dditectif y diweddar John Ellis Williams am brifardd y Gadair yn cael ei saethu ar y llwyfan yn ystod y seremoni - nofel a gyfieithwyd i'r Saesneg dan y teitl Murder at the Eisteddfod ac a gyhoeddwyd gan Wasg Gomer yn 1973.
Un peth yr oedd yr awdur yn falch iawn ohono am yn nofel honno oedd sut y gallodd 'guddio' yr ergyd o wn y llofrudd mewn pafiliwn llawn o filoedd o bobl.
Wnai ddim bradychu'r gyfrinach - dim ond dweud na allai'r nofel fod wedi gweithio y dyddiau hyn o gamerâu digidol.
Tybed oes gennych chi hoff lyfr steddfod - anfonwch air.
SylwadauAnfon sylw
Beth am Y DDRAIG GOCH gan Emlyn Roberts - "Nofel dditectif, gydag elfen gref o ffars, sy'n troi o gwmpas llofruddio'r Archdderwydd mewn Eisteddfod Genedlaethol." - ys dywed y blyrb!