Sicr ei drawiad
Mae Dafydd Wyn Jones yn cael ei ddisgrifio fel "un o'n pennaf englynwyr" gan olygydd barddol un o'r papurau enwadol.
Ac i brofi'r pwynt mae Geraint Lloyd Owen yn dyfynnu tusw o'i englynion yng Nghornel y Beirdd rhifyn yr wythnos hon o'r Goleuad.
Geraint, meddai, lywiodd gyfrol ddiweddar Dafydd Wyn Jones, Cynefin, drwy'r wasg yn rhinwedd ei swydd fel Swyddog Cyhoeddi Gwasg y Bwthyn ac o'r gyfrol honno y daw ei ddetholiad.
"Bu yn un o hoelion wyth ymrysonfeydd y Babell Lên a'r Talwrn ers blynyddoedd, a'i ergydion barddol yn ennyn cymeradwyaeth a 'deg marc' cyson gan fy mrawd bach," meddai.
Ac yn y cywair hwnnw un o'r englynion y mae'n ei ddyfynnu o'r gyfrol ydi Beddargraff Meuryn:
Ni welai grefft na delwedd, gwael ei farc,
Gwelai fai'n ddiddiwedd,
A phwt gwan digynghanedd
A wna'r tro i farcio'i fedd.
Englyn arall sy'n goglais yw Nodyn Rhiant i Brifathro
Bennaeth, os gelli, esbonia - ffrydio
Ein Ffredi i'r isa'
A chog Agnes drws nesa' -
Hen yffar dwl - i Ffrwd A.
Dywed Geraint y bydd mwy "i fawrygu dawn yr englynwr bythwyrdd hwn" yn rhifyn yr wythnos nesaf o'r Goleuad.
Edrychwn ymlaen.
