'Noson wachul a diffyg chwaeth!'
Difyr gweld nad oeddwn yr unig un a siomwyd â seremoni cyhoeddi Rhestr Hir Llyfr y Flwyddyn ym Mangor ddechrau'r mis.
"Gwachul," yw disgrifiad y llenor a'r beirniad llenyddol John Rowlands o'r achlysur yn rhifyn Mai 2010 o - ef, wrth gwrs, yn un a allai fod wedi ennill y wobr pe byddai mewn bodolaeth pan oedd ar ei anterth.
"Seremoni wachul a gafwyd, " meddai gan fynd ymlaen i feirniadu acwsteg "anobeithiol" yr ystafell fel na phrin "y gellid clywed y siaradwyr o'r llwyfan yn glir," meddai gan ychwanegu:
"Prin y gellid eu gweld chwaith, a'r haul yn tywynnu o'r ffenestr tu cefn iddynt.
"Yn waeth byth, pan oedd y seremoni yn tynnu at ei therfyn, dyma sioe deledu yn cychwyn yn y cefn i gystadlu gyda'r darllenwyr ar y llwyfan, nes bod cwestiynau arwynebol ac ystrydebol y gohebwyr teledu'n boddi'r lleisiau ar y llwyfan. Anfaddeuol!"
Heb anghofio, wrth gwrs, eu sŵn yn mynd a dod dros y llawr swnllyd!
Ond o fwy o bwys na'i sylwadau am yr achlysur ei hun yw sylwadau John Rowlands am ddewis y tri beirniad, Y Prifardd John Gwilym Jones, Aled Lewis Evans a Branwen Gwyn, o ddeg o llyfrau.
Mae'n ddamniol gan awgrymu "rhagfarn" o gadw nofel Fflur Dafydd, Y Llyfrgell, oddi ar y rhestr a honno wedi ennill Gwobr Goffa Daniel Owen yn y Genedlaethol a "sawl gwobr arall".
Mae'n holi hefyd "lle'r oedd nofel ysgytwol Lloyd Jones, Y Dŵr" a Dala'r Llanw, Jon Gower a Milwr Bychan Nesta gan Aled Islwyn.
A chan roi un warrog arall i ben yr hoelen gorffen ei sylwadau trwy ddweud:
"Onid profi mae hyn mai mater o chwaeth yw'r cyfan? Nage ddim - mater o ddiffyg chwaeth yn aml iawn."
Dyn heb ei blesio mae'n amlwg - beth wnewch chi o'r rhestr o ddeg?
SylwadauAnfon sylw
Ai diddanwch diweddaraf y Cymry yw lladd ar ddewis beirniaid Llyfr y Flwyddyn? Clywais Catrin Beard yn budr draethu yr un druth ar donfeddi Radio Cymru. Onid yw'n bryd dileu'r 'gystadleuaeth' hon i osgoi'r ffrae flynyddol sydd mor nodweddiadol ohonom fel Cymry?
Hyn neu gyfieithu pob llyfr a chael barn cwbl annibynnol am y cynnwys gan feirniaid profiadol yn ochra Llundain. A hwythau ddewis y deg gorau.