Cylchgrawn newydd
Y sôn ydi bod yna gylchgrawn Cymraeg newydd ar y gweill ar gyfer yr Eisteddfod Genedlaethol yng Nglynebwy.
Yn y Genedlaethol yn Y Bala y llynedd gwelwyd dau gylchgrawn newydd, un gan Y Lolfa i gystadlu â Barn am arian Cyngor Llyfrau Cymru a'r llall, WA-w!, yn fenter gan Lowri Rees-Roberts o'i chartref yn Llanuwchllyn ac yn dal i gael ei gyhoeddi - heb gymorth grantiau.
Dywedir mai "ar gyfer pobol ifanc" rhwng 16 a 24 y mae'r cylchgrawn newydd a'i wreiddiau yn Nyffryn Ogwen gyda'r prifardd Gwynfor ab Ifor ymhlith y rhai sydd tu ôl iddo.
Mae o wedi bod yn llythyru â phobl yn chwilio am gymorth hysbysebion.
Y bwriad meddai ydi ei ddosbarthu'n helaeth ym Maes B, mewn ysgolion ac o ddrws i ddrws mewn ardaloedd penodol.
""Byddwn hefyd yn ei ddosbarthu am ddim gyda Y Faner Newydd (cylchrediad 1,000). Trwy hyn rydym yn anelu at werthu hyd at 6,000 o gopïau," meddai.
"Mae dros 20 o bobl ifanc 15 i 19 oed yn aelodau o'r Bwrdd Golygyddol, dan arweiniad pwyllgor llywio profiadol, felly rydym yn hyderus y bydd yn gylchgrawn lliwgar a ffres ac y bydd yn apelio at bobl ifanc ym mhob rhan o Gymru," eglura.
"Bydd hefyd yn ceisio adlewyrchu gwerthoedd mwy parhaol ein cymunedau ac yn rhoi cip ar y cyfoeth diwylliannol sy'n cronni dan yr wyneb mewn un ardal fechan. Gobeithiwn y bydd yn gosod patrwm i ardaloedd eraill ac yn hybu ac ehangu'r defnydd o'r Gymraeg ym mhob ardal," meddai.
Addewir "Cymraeg clir, syml a chywir" a fydd "yn dal naws a chyffro'r genhedlaeth ifanc" ac oddeutu 60 tudalen!.
"Bydd yn dangos beth sy'n bosib yn Gymraeg a, gobeithio, yn ysgogi bröydd a chymunedau eraill i wneud yr un fath," meddai.
Digon i gadw unrhyw un yn ddiddig yn ei babell ar Faes B.
