³ÉÈËÂÛ̳

Dydd Llun
Wel dyma ni unwaith eto! Blwyddyn arall wedi mynd heibio, a channoedd o gystadleuwyr yn anelu am y rhagbrofion yma yn Llanerchaeron, a finna wedyn yn cael y fraint o holi hwn a llall gefn llwyfan.

Wrth grwydro'r maes ben bore, fe ges i sgwrs gyda sawl grŵp o rieni nerfus oedd yn sefyllian tu allan i'r rhagbrofion ac fel rhiant fy hun dwi'n gwybod yn union sut oedden nhw'n teimlo.

O'n i'n swp sâl yn rhagbrawf unawd piano - yn gwrando ar Elin yn perfformio ac yn gwybod yn iawn hefyd na fedrwn i byth gyflawni'r un gamp fy hun.

Ymhlith y mamau nerfus ar y maes, mi ges i sgwrs hefo tair o Ysgol Gymraeg Llundain - y brifathrawes, Menna George, y ddarlledwraig Sioned Wiliam a'r gantores, Cerys Matthews!

Roedd Cerys yno i gefnogi ei merch yn y gystadleuaeth grŵp dawnsio gwerin cynradd, ac wrth ei bodd eu bod nhw yma yn cystadlu.

Roedd ganddyn nhw barti canu hefyd, ond pan ofynnais i Cerys os mai hi oedd wedi bod yn hyfforddi - yr ateb ges i oedd "Not guilty"!

Cerys, Nansi a Beca
Nôl a fi wedyn i gefn llwyfan, sôn am gymeriadau mewn ambell i gystadleuaeth! Dyna ichi'r unawd gerdd dant dan saith oed a thair ar y llwyfan - Cerys, Nansi a Beca.

Wnaethon nhw ddim stopio siarad!! Roedd Nansi wedi gwirioni ei bod wedi cyrraedd y llwyfan, a hithau'n gwisgo dwy freichled lwcus.

Mi wnes i ofyn gawn i fenthyg un ohonyn nhw ond fe ges i ateb reit bendant - a dwi'n dal yn ddi freichled!

Cafodd Ysgol Gynradd Llanerfyl ddiwrnod llwyddiannus iawn heddiw - un wobr gyntaf a sawl gwobr arall. Mae'n werth nodi mai ysgol fechan ydi hon, - 50 o blant yn unig a nifer fawr ohonyn nhw yn cystadlu yma eleni.

Unawd piano
Nol at yr unawd piano, a'r tri ar y llwyfan - Charlie Lovell Jones, Nest Jenkins a Gwenno Morgan yn cyrraedd yr uchelfannau o ran safon.

Mae'n anodd credu ein bod ni'n sôn am blant dan 12 oed. Charlie ddaeth i'r brig - hogyn hynod o ddawnus a hoffus, sydd yn treulio tua dwy awr a hanner yn ymarfer bob dydd!!

Sôn am hoffus, roedd hi'n braf cael sgwrs hefo Eilir Pryse unwaith eto.

Dwi'n cofio Eilir yn cystadlu ar y llefaru rai blynyddoedd yn ôl ond erbyn hyn mae o hefyd yn gerddor o fri ac fe enillodd o gystadleuaeth eleni i gyfansoddi ffanffer i gyfarch y buddugol yn seremonïau'r Urdd yr wythnos hon.

Mae pobl ddawnus fel hyn yn bobl brysur - ac mae o wedi bod yn brysur yn cyfeilio ar y ffidil yn y sioe Plant y Fflam ac mae o hefyd yn cystadlu ar y llefaru ddiwedd yr wythnos.

Gwartheg perffaith - bron
Un o'r profiadau mwyaf rhyfedd ges i heddiw oedd cael fy nghornelu gan griw o wartheg Friesans!! Criw o wartheg o Ysgol Pen Barras oedden nhw - yn cystadlu hefo'r parti cerdd dant oed cynradd. A son am siaradwyr da!

Pan ofynnais i iddyn nhw roi marc i'w perfformiad allan o ddeg, fe fuon nhw'n trafod yn hir cyn dewis naw a hanner. Dyma fi'n holi wedyn am yr hanner marc arall, ac ateb Dyfan, un o'r criw, oedd "Does neb yn berffaith!" Ateb doeth gan un mor ifanc.

Gan fy mod i wedi sôn am Ysgol Llanerfyl yn barod, mae'n rhaid imi hefyd grybwyll Ysgol Bro Tryweryn fu'n cystadlu heddiw - ar y dawnsio gwerin.

Dim ond 26 disgybl sydd yn yr ysgol, ac roedd bron bob un ohonyn nhw ar y llwyfan heddiw! Dyna gamp.

Diwrnod da iawn a dechrau addawol i'r wythnos.