³ÉÈËÂÛ̳

Daeth siorts Selwyn Iolen yn adnabyddus i'r byd pan ddatgelwyd hwy yn haul llygaid goleuni y wefan hon pan ymgymerodd Selwyn a'i ddyletswydd archdderwyddol yn Eisteddfod Genedlaethol Eryri ar Barc y Faenol 2005.

Wrth fynd rhagddo i urddo T James Jones yn Archdderwydd newydd bnawn ddoe datgelodd Selwyn o'r Maen Llog:

"Mae o wedi gofyn am un ffafr i mi ac yr ydw i wedi bod yn ystyried y ffafr honno o ddifrif," meddai.

"Be ddwedodd o wrthyf i ar ôl cael ei ddewis yn Archdderwydd , 'Selwyn,' medda fo, 'oes na bosib cael benthyca'r siorts?'

"Ac mae'r rhai ohona chi sy'n newid yn y stafelloedd na yn gwybod mai'r nesaf peth i ddim sydd gen i dan y wisg yma ac fe fûm i'n hir ystyried hyn ac mi benderfynais yn y diwedd y byddwn i yn eu rhoi nhw fel anrheg i'r Archdderwydd newydd.

"Ond mae yna amod, ei fod yntau hefyd , pan ddaw ei dymor i ben mewn tair blynedd yn eu trosglwyddo nhw i'w olynydd yntau yr adeg honno."

Yn ystod ei araith ef ymateb yr Archdderwydd newydd i'r cyhoeddiad annisgwyl oedd:

"Diolch hefyd am y siorts - ac rwy'n addo eu gwisgo nhw rhywbryd."

Yn anffodus i rai - ond yn ffodus i eraill siŵr o fod - nid aeth y ddau ymlaen i gyfnewid siorts yn gyhoeddus ar y Maen Llog ddoe - er i rywun o'r gynulleidfa weiddi i awgrymu hynny.

Ni all rhywun ond dyfalu beth fyddai Cynan wedi ei wneud o hyn oll . . .