Allan o'r byncar
I gyd-fynd â chynnal cystadleuaeth Cwpan Ryder yng Nghymru mae Gwasg Carreg Gwalch wedi cyhoeddi'r nofel gyntaf yn y Gymraeg gyda chwarae golff yn gefndir iddi.
Fel yr adroddwyd ar y wefan hon yn gynharach cafodd yr awdur, Gareth william Jones, ei hun mewn dipyn o dwll wrth ddewis teitl i'r nofel - oherwydd helyntion Tiger Woods oddi ar y cwrs golff.
Y teitl gwreiddiol oedd Dilyn y Teigr ond oherwydd anturiaethau'r golffiwr y tu allan i'r gêm penderfynodd Gareth mai gwell fyddai newid y teitl hwnnw.
"Teitl y nofel erbyn hyn yw Breuddwyd Monti," meddai gan egluro mai nofel yw hi am fachgen o'r enw Marc Montgomery sy'n ei chael yn anodd gwireddu ei freuddwyd o chwarae golff.
Dywedodd Gareth i'r syniad ddod pan roedd yn chwarae golff yn ei glwb, Borth ac Ynyslas, ger Aberystwyth.
"Sylwais bod nifer fawr o blant yn chwarae ar y cwrs a'u bod yn chwaraewyr da iawn hefyd," meddai.
Eisoes yn awdur cyfres am chwarae rygbi rhoddodd gynnig ar golff fel cefndir."Mae llawer o ferched yn ogystal â bechgyn yn chwarae golff wrth gwrs," meddai Gareth, "ond wrth i'r stori dyfu yn fy mhen penderfynais mai dweud stori am fachgen y baswn i," meddai.
Er, rwy'n gobeithio y bydd y nofel yn apelio at bawb, ac yn denu plant nad sy'n chwarae golff i ddilyn breuddwyd Monti a dechrau chwarae'r gêm," ychwanegodd.
Mae Gareth hefyd yn gobeithio y bydd cyhoeddi'r nofel gyntaf yn y Gymraeg â chefndir golff iddi yn cyfrannu ryw ychydig at ddathlu cynnal Cwpan Ryder yng Nghymru am y tro cyntaf.
