O'r Steddfod i'r Senedd?
Wrth i Steddfod arall gael gwynt dan ei hadenydd mae rhywun yn darllen yn y cylchgrawn WA-w! sydd ar werth ar y Maes beth oedd Prif Weithredwr yr Wyl - Y Mr Steddfod ei hun, Elfed Roberts - yn ei wneud mewn oes arall.
Cyn dod yn drefnydd Steddfod mi fuo fo yn ohebydd gyda phapurau'r Herald yng Nghaernarfon - a gwell 'datgan diddordeb' yn fama gan i'n gyrfaoedd ni'n dau orgyffwrdd y cyfnod hwnnw mewn swyddfa nad oedd wedi llwyr adael y bedwaredd ganrif ar bymtheg!
Oddi ynio aeth Elfed i werthu bwydydd anifeiliaid i ffermwyr Mon ac Arfon gan fentro wedyn i faes trefnu Steddfodau - gyda'r Urdd i gychwyn cyn cael swydd gyda'r Eisteddfod Genedlaethol wedyn.
Gyrfa ddigon amrywiol - ond nid cweit digon amrywiol gan Elfed mae'n ymddangos achos pan ofynnodd WA-w! iddo pa swydd arall y byddai wedi hoffi rhoi cynnig arni ei ateb oedd "Prif Weinidog Cymru".
Ac wrth gwrs mae amser i hynny ddigwydd hefyd - ond y bydd yn rhaid disgwyl pedair blynedd dda tan yr etholiad nesaf.
Ond mi allwn ni ddechrau dychmygu'n awr y Cynulliad yn cael ei redeg fel Steddfod.
A'r eitem gyntaf ar yr agenda?
"I ystyried peintio adeilad y Senedd yn y Bae - yn binc."
Hei lwc Elfed.
Mwy o'r Eisteddfod: Canlyniadau, gwylio'n fyw, straeon, clipiau teledu, blogiau a newyddion o'r Maes.
