Kate ac eraill
Derbyn rhestr ddifyr o lyfrau oddi wrth Y Lolfa - y llyfrau fydd y wasg yn eu cyhoeddi rhwng hyn â'r Nadolig.
Yn eu plith mae Cofiant Kate Roberts gan Alan Llwyd sydd yn siŵr o fod yn dipyn o lyfr.
Mae'n ei ddisgrifio fel "cofiant edmygus" i "Gymraes fwyaf yr ugeinfed ganrif".
Yr hyn sy'n syndod yw mai dyma'r cofiant cyntaf i i'r wraig y cyfeirir ati byth a hefyd fel "Brenhines ein llên" ac un a chanddi fywyd diddorol hefyd gydag Alan yn addo dadlennu llawer iawn am y bywyd hwnnw gan gynnwys y dyfyniadau cyntaf o'i dyddiaduron.
"Bydd y gyfrol yn dadlennu'r gwirionedd am ei pherthynas hi a'i gŵr; perthynas ei gŵr a Prosser Rhys a sawl stori ffrwydrol arall," meddai'r Lolfa am y gyfrol.
Un am yr hosan Nadolig heb os.
Cofiant arall sy'n ymddangos yn addawol ydi un yr actores Sharon Morgan. Mi gafodd hi 'mensh', chwedl hwythau, yn hunangofiant Meic Povey - tybed fydd hi'n ymateb?
I weld y rhestr lawn o lyfrau ymwelwch â gwefan y Lolfa lle mae am holl gyhoeddiadau'r Nadolig sy'n cynnwys cyfrol gan John Meirion Morris a Gwyn Thomas, hanes brwydr Heulwen Haf â chanser y fron a hanes Tony ac Aloma.
