³ÉÈËÂÛ̳

Gair i gall cyn dechrau - peidiwch byth â lladd ar y wraig. Dyna'n union wnaeth Trefor Pugh o Drefenter ger Aberystwyth yng nghystadleuaeth goffa Lady Herbert Lewis lle'r oedd o'n canu alaw werin anghyfarwydd i mi, Castiau Gwraig ac yn cwyno ar ei fyd yn y penillion cyntaf, cyn gweld y goleuni ar ddiwedd y gân a sylweddoli pa mor lwcus oedd o i gael gwraig o gwbl!

A llongyfarchiadau mawr iddo ar ennill y gystadleuaeth hon hefyd.

Dwi wedi sôn yn barod am 'y dwbl' sydd yn gysylltiedig â'r Eisteddfod yn Wrecsam, ac un arall sydd wedi llwyddo i gyflawni dwbl - a hynny o fewn yr un gystadleuaeth ydi Carwyn John sydd wedi ailadrodd ei gamp yng Nghasnewydd yn 2004 ac ennill eto Wobr Goffa Llwyd o'r Bryn

.
Wrth gwrs nid ar chwarae bach mae rhywun yn gwneud hyn ac mae Carwyn rŵan yn ymuno â chriw dethol iawn yn cynnwys y diweddar Stewart Jones a Sian Teifi - sy'n hyfforddi Carwyn.

Mae mynd ati i ffurfio côr meibion newydd yn dipyn o dasg. Yn ogystal â chael digon o aelodau a threfnu lle i ymarfer mae angen meddwl am enw.

Un na chafodd drafferth yn y byd ydi Elis Gruffydd. Casglodd griw ynghyd sydd yn cynnwys rhai o Gaerdydd a gorllewin Cymru, ymarfer yn nhÅ· ei fam a dewis enw bach slic iawn, Animato.

Ydi, mae animato' yn derm cerddorol ond o dorri'r gair yn ddarnau mi gewch chi "a ni 'ma to"!

Ond i chi gael gwybod y gwir - yr enw cyntaf ddaeth i feddwl Elis oedd Côr Blimey ond gan nad oedd ei fam yn or-hoff o'r enw yma bu'n rhaid ail feddwl.

Ta waeth, llongyfarchiadau mawr i Elis ac Animato ar ennill y gystadleuaeth i gorau meibion rhwng 20 a 45 o leisiau - a hynny ar eu cynnig cyntaf erioed.

Uchafbwynt arall heddiw oedd cystadleuaeth y Rhuban Glas a llongyfarchiadau mawr i Gwyn Morris o Aberteifi ar ennill. Ac yn ogystal a bod yn unawdydd talentog iawn mae Gwyn hefyd yn aelod o Gôr Undebol Ar Ôl Tri ac Animato!

Y gystadleuaeth gorawl olaf ar lwyfan y Brifwyl eleni oedd cystadleuaeth y corau meibion mawr - dros 45 mewn nifer a'r côr ddaeth i'r brig eleni oedd Côr Meibion Rhosllannerchrugog ac yn naturiol roedden nhw wrth eu boddau a braf iawn oedd cael sgwrs hefo Len Gilpin sy'n aelod ers 1948.

A dyna ni; wythnos arall o holi ar ben.
A sôn am wythnos dda oedd hi. Cyfle i weld hen ffrindiau a chreu llu o rai newydd.

Diolch eto i bawb fu'n fodlon sgwrsio hefo fi am y byd â'i bethau ac os byw ac iach mi gwelai chi eto ym Mro Morgannwg flwyddyn nesaf.