|  |
Gwisgo Ioan Gruffudd ar gyfer yr Orsedd!
 Yr oedd bore Llun yn fore i Feistres y Gwisgoedd yn yr Orsedd nid yn unig helpu un o actorion mwyaf adnabyddus Cymru roi ei wisg orseddol ond i hel atgofion am Ioan Gruffudd pan yn grwtyn.
Dywedodd Sian Aman o'r Betws ger Rhydaman ei bod hi yn cofio Ioan Gruffudd yn dod i'r pentref yn grwtyn bach gyda'i dad, Peter, a oedd yn alwr poblogaidd mewn twmpathau dawns yr adeg honno.
"Wnes i erioed feddwl yr adeg honno y byddwn i'n ei helpu baratoi ar gyfer cael ei dderbyn yn aelod o Orsedd y Beirdd y bore ma," meddai Sian fore Llun.
Hi oedd yn cynorthwyo Ioan gyda'i wisg derwyddol ar gyfer cael ei dderbyn yn aelod er anrhydedd o'r Orsedd yng nghyfarfod cyntaf yr Orsedd yn Eisteddfod Meifod.
"Yr oedd yn brofiad hyfryd," meddai ac rwy'n edrych ymlaen yn arbennig at osod y penwisg arno fe yng nghylch yr Orsedd. Yr oedd yn brofiad bendigedig yn enwedig ac ef yn shwt gymeriad diymhongar a hyfryd," meddai.
Yn cael ei gwrso gan aelodau eraill o'r Orsedd yn manteisio ar y cyfle i gael ei lofnod ym mhrysudeb yr ystafell wisgo ar Faes yr Eisteddfod nid oedd yn syndod i Ioan ddweud ei fod yn teimlo'n fwy nerfus ar yr achlysur hwn na phan yn paratoi ar gyfer rhannau actio.
"Yn naturiol," meddai, "yr ydw i wrth fy modd. Rwy heb ddod dros y peth yn iawn. Rwy'n teimlo'n ostyngedig iawn," meddai gan gadarnhau y byddai yn cychwyn yn syth i ffilmio yn Iwerddon wedi'r seremoni rhwng meini'r Orsedd yn y Trallwng.
"Rhaid imi ddweud, dyma'r mwyaf nerfus yr ydw i wedi teimlo does yna ddim byd arall yn cymharu 芒 hyn," meddai wrth baratoi i gyrchu'r bws a a fyddai'n ei gludo ef a gweddill aelodau'r Orsedd i'r Trallwng bymtheng milltir i ffwrdd.
|
|
|
|
