³ÉÈËÂÛ̳

Mae teithwyr ar drenau yn y de yn cael eu hannog i wirio eu teithiau wrth i waith ddechrau ar gymal nesaf Metro De Cymru.

Bydd gorsaf Heol y Frenhines yng Nghaerdydd - pedwaredd orsaf brysuraf Cymru - yn cau ddydd Sul ar gyfer dechrau'r gwaith peirianyddol.

Fe fydd hynny yn effeithio ar nifer o wasanaethau o dro i dro tan fis Tachwedd.

Dywedodd Trafnidiaeth Cymru (TC) y bydd Metro De Cymru yn ffordd "fodern, effeithlon a chynaliadwy" o deithio.

"Bydd gwaith trawsnewid yn digwydd ar draws linellau'r cymoedd wrth baratoi ar gyfer Metro De Cymru, a'r llinellau sy'n cysylltu â nhw," meddai llefarydd.

"Mae TC yn annog cwsmeriaid i wirio eu teithiau, gan y bydd bysiau yn rhedeg yn lle trenau mewn rhai llefydd."

Mae'n wasanaeth trafnidiaeth integredig sy'n cynnwys trenau, tramiau a bysiau, ac mae'n cael ei adeiladu ar hyn o bryd yn y de-ddwyrain.

Mae prif ffocws y gwaith ar reilffyrdd "craidd" y cymoedd - rheiny sy'n cysylltu gyda Chaerdydd.

Mae'r rhain yn cael eu trydaneiddio, gyda'r nod yn y pendraw o osod 36 o drenau-tram newydd ar y rhwydwaith.

Mae rhai o'r rheiny mewn defnydd eisoes, gyda disgwyl iddyn nhw oll fod ar y traciau erbyn diwedd 2024.

Mae 40 o orsafoedd yn cael eu hailwampio hefyd.

Y gobaith, o fewn dwy flynedd, ydy y bydd modd i deithwyr anghofio am yr amserlenni traddodiadol oherwydd bod gwasanaethau mor gyson, gydag o leiaf un pob chwarter awr.

Bydd gorsaf Heol y Frenhines yn cau ddydd Sul, a dyma'r "cyntaf o sawl gwaith peirianneg fydd yn cael effaith ar wasanaethau'r orsaf", medd Trafnidiaeth Cymru.

Mae disgwyl i'r orsaf fod ar gau eto rhwng 27 Hydref a 1 Tachwedd.

Ddydd Sul, bydd bysus yn rhedeg yn lle trenau ar amryw o wasanaethau o amgylch y brifddinas.

Mae disgwyl i ran gyntaf y gwaith ar Metro De Cymru gael ei gwblhau erbyn dechrau 2026.