Amseru Gareth
Mae amseriad datganiad Gareth yn ddiddorol gan awgrymu i rai ei fod wedi oedi tan ar ôl i'r ymgeiswyr rhanbarth gael eu dewis er mwyn cau allan neu roi hwb i ymgeisydd posib yn Aberconwy. Dydw i ddim yn credu bod Gareth Jones y fath o ddyn i ymddwyn felly. Mae ei gyhoeddiad cymharol hwyr yn y dydd yn fwy o fater o'i chael hi'n anodd penderfynu yn fy marn i.
Ta beth am hynny mae'r penderfyniad yn gwneud pethau'n llawer anoddach i Blaid Cymru yn Aberconwy. Pwy fydd yn cael y dasg o geisio cadw gafael yn y sedd i'r blaid? Mae 'na lawer o son am Iwan Hughes cyn-gyfarwyddwr yr Ymddiriedolaeth Genedlaethol yng Nghymru ond fe fydd 'na enwau eraill yn y ffrâm.
Wrth gwrs yn unol â mathemateg greulon y system etholiadol fe fyddai colli Aberconwy yn newyddion da i Llŷr Hughes Griffiths ac o bosib Heledd Fychan, yr ymgeiswyr rhestr. Yn yr un modd yn y Canolbarth a'r Gorllewin mae'n anodd credu nad yw Nick Bourne yn dawel obeithio na fydd y Ceidwadwyr yn cipio Maldwyn gan aberthu sedd rhestr eu harweinydd!
Gwaharddiad ail Ddeddf Llywodraeth Cymru ar ymgeisyddiaeth ddwbl sydd wedi creu'r sefyllfaoedd hynod arteithiol - iddyn nhw, a hynod ddifyr i ni! Does rhyfedd efallai bod Hywel Williams yn gobeithio cyflwyno gwelliant i'r Mesur Pleidleisio ac Etholaethau o gofio bod ei ddyweddi yn gobeithio bod yn ymgeisydd rhestr!
Golygydd Materion Cymreig y ³ÉÈËÂÛ̳ yn blogio'n rheolaidd ar faterion gwleidyddol Cymru.
SylwadauAnfon sylw
Arnai ofn mod i'n un o'r darllenwyr sydd heb glywed am y dewisiadau rhestr. Alli di rannu'r newyddion? Hefyd, wyt ti'n gwybod pryd mae'r rhanbarthau eraill yn dewis?
Gogledd; Llyr Hughes Griffiths, Heledd Fychan, Dyfed Edwards, Liz Saville- Roberts
Canolbarth Simon Thomas, Angela Elniff-Larsen, John Dixon, Rhys Davies
Mae rhanbarthau Canol a Dwyrain De Cymru yn fuan, mae 'na rai wythnosau cyn Gorllewin De Cymru.
Mae na ddwy ranbarth yn cyhoeddi dydd Sadwrn nesa. Beth am hyn fel rhestr eith am Aberconwy:
1. Phil Edwards.
2. Iwan Hughes.
3. John Penri
4. Paul Rowlinson.
Phil Edwards ydy'r unig un hefo pleidlais bersonnol rywbeth tebyg i Gareth ac hefo siawns i ennill. Os ennillith y Tories y sedd mae Isherwood (debyg) wedi mynd i abergofiant!
Er mwyn osgoi camddealltwriaeth - roedd Pwyllgor Rhanbarth (Plaid Cymru) yn ymwybodol o benderfyniad Gareth Jones cyn i'r pleidleisiau ar gyfer y rhestr gael eu cyfri ddydd Sadwrn.
Colled anferth. Yr oedd yn siarad yn gall ac yn wybodus iawn mewn cyfarfod ymylol yng nghynhadledd y blaid. Yr wyf yn pryderu'n fawr os gadewir polisi addysg y Blaid yn nwylo rhai o'r gwleidyddion proffesiynol sydd bellach yn gyfrifol amdano.
Beth nad ydi'r rhestr ar gyfer y Gorllewin a'r Canolbarth yn ddangos yw na chafodd Angela Elniff-Larsen DDIM UN pleidlais gynta a dim ond pedair pleidlais ail ddewis (yn golygu yn ôl y system STV fod ganddi gyfwerth â 2.2 pleidlais) tra bod John Dixon wedi cael 120 (o gymharu â 160 i Simon Thomas.. Doedd hi ddim hyd yn oed wedi bod yn bresennol yn y cynadleddau dewis. Felly sut yn y byd y gall hi fod yn iawn ei bod hi yn yr ail le a John Dixon yn drydydd? Mae yn yn dod â gwarth ar y Blaid ac yn gwneud dim i sicrhau lle teilwng i ferched o'i mewn. Dylai Angela dynnu ei henw'n ôl.