成人论坛

Bu Eisteddfod Yr Wyddgrug yn un hynod o brysur i Catrin Jones. Cyrhaeddodd tri o'i disgyblion y llwyfan yng nghystadleuaeth Gwobr Goffa Richard Burton ac iddi hi y dyfarnwyd gwobr y cynhyrchydd drama fer gorau.

Yma, mae'n son am ei hwythnos ddramatig ac yn holi tybed a yw'r ddrama yn cael sylw haeddiannol ar y cyfryngau.

Ychydig o sylw a roddir i fyd y ddrama ar raglenni'r Eisteddfod ar S4C.
Nid fy ngeiriau i yw'r rhain.
Mae'n anodd i mi ddweud gan imi fod yn carafanio drwy'r wythnos a dim teledu yn agos i'n carafan ni - diolch byth!

Ond dyma beth a glywais heddiw gan rywun fu'n gwylio pob rhaglen o glydwch ei chartref ac yn gefnogwr brwd o fyd y ddrama.

O'r pafiliwn

Trueni mawr, er enghraifft, fu symud Seremoni'r Fedal Ddrama o'r Pafiliwn flynyddoedd yn 么l. Os mai derbyn hyn fu raid o leiaf gallwn ymhyfrydu ein bod yn creu naws gartrefol, glos, yn y theatr a braf oedd cael teilyngdod a safon uchel ymhob un o'r cystadlaethau drama.

Hip hip hwre medda fi!
Mae'r byd drama ar i fyny!
A do, cafwyd sylw haeddiannol i Nic Ros enillydd y Fedal Ddrama - ond beth am bopeth arall yno?

A roddwyd sylw i'r perfformiadau yno?
A roddwyd sylw i'r cwmniau amatur hynny sy'n asgwrn cefn i'n cymunedau?
Gwelais sawl criw camera o gwmpas Theatr y Maes ond a ddarlledwyd y ffilmio hwn?

Dim digon o gydnabyddiaeth

Pam ydwi'n rhefru medde chi?
Wel, rheswm cwbl hunanol sydd gen i eleni sef fy mod yn teimlo nad oedd digon o gydnabyddiaeth i ribidires o lwyddiannau'r theatr a'r gweithgareddau dramatig ar y maes.

Ag eithrio bod cystadleuaeth Gwobr Goffa Richard Burton yn ymddangos ar lwyfan y Pafiliwn a fyddai hi'n cael ei darlledu? Gyda llaw roedd 24 o bobl ifanc dawnus iawn wedi ymddangos yn y rhagbrawf a thri a hyfforddwyd gen i yn dod i'r brig. Da iawn chi Gwion, Aaron a Manon - diolch am wireddu breuddwyd!

I ddweud gwir roedd dydd Mercher yn ddiwrnod i'w gofio wrth imi ruthro o wrando ar ddyfarniad y Richard Burton i Theatr y Maes i dderbyn Cwpan Gwynfor am ennill y gystadleuaeth Actio Drama Fer a Chwpan Bro Dinefwr am fod yn gynhyrchydd gorau'r cwmniau amatur.

Panto gan Gwenlyn Parry a berfformiwyd, a disgyblion Ysgol y Creuddyn a ymlafniodd i ennill cystadleuaeth mor uchel ei safon.

Roedd ennill hon yn golygu cymaint; yn brofiad sentimental iawn gan mai dyma fy swansong neu gan ffarwel i Ysgol y Creuddyn cyn dechrau ym Modedern ym mis Medi.

Diolch i'r rhai a fu'n gynulleidfaoedd dros dair noson o gystadlu.
A roddwyd sylw ar deledu? Pwy a wyr?

Mwynhau'r mwynhau

"Lle bo camp mae rhemp," medda'r hen ddywediad a Champ a Rhemp gan Tony Llewelyn a berfformiwyd gan Theatr Fach Llangefni nos Wener ac mi gawsom ni fel cast clamp o hwyl a dwi'n meddwl i'r rhan fwyaf o'r gynulleidfa fwynhau hefyd - mwynhau ein gweld ni yn mwynhau ein hunain!

Ond dydw i ddim yn honni ein bod ni fel cwmni wedi gwneud rhyw gamp fawr ond ni a chwmniau eraill tebyg yw asgwrn cefn y diwylliant dramatig erbyn hyn ac yn meithrin y talentau ifanc fydd yn llenwi'r llwyfannau a rhaglenni teledu proffesiynol.

Gallasai S4C gynnal sawl rhaglen ar y cwmniau hyn a'u tebyg, ar enillwyr y cystadlaethau drama ac ar berfformiadau.
Pam na wneir hynny?