Darllenais fod China yn chwilio am hyfforddwyr i ddatblygu rygbi yno. Yma yng ngwlad Groeg, fodd bynnag, mae gennym yr hyfforddwyr - chwaraewyr sy'n brin!
Ond, yn araf bach, mae nifer y rhai sydd â diddordeb yn codi. Ar y cychwyn roedd yna fwy o estroniaid na Groegwyr yn chwarae ond mae arwyddion fod y llif yn troi gyda mwy o Roegwyr am gydio yn y bêl hirgron!
Ychydig amser yn ôl cefais ben-blwydd go wahanol i'r cyffredin. Dechreuodd yr annisgwyl, wedi imi ffonio gŵr o'r enw Te yn Athen ar ôl gweld hysbyseb ganddo mewn papur wythnosol Saesneg yn gofyn am i unrhyw un â diddordeb mewn rygbi gysylltu ag ef.
Ef awgrymodd y dylwn gysylltu â rhywun o'r enw Patrick Sawres yn Thessaloniki.
Yr oedd Patrick wrth ei fodd clywed fod rhywun â diddordeb yn ei dîm er yn siomedig nad oeddwn yn llanc a allai ymuno â nhw!
 O Gaerfaddon y daw ef yn wreiddiol ac wedi chwarae rygbi i dîm y brifysgol yno pan yn fyfyriwr.
Ef, yn awr, ydy ysgrifennydd clwb Spartakos yma yng ngogledd Groeg ac yn gapten y tîm.
Cenhadwr i'r eglwys Efengylaidd ydyw yn ôl ei alwedigaeth.
Eu gweld yn ymarfer
Mae'r tîm yn ymarfer ar barc yn Thermi, lle rwy'n byw, bob nos Fercher o 7.00 tan 9.00 ac ar foreau Sadwrn o 10.00 tan 12.00. Cefais wahoddiad i fynd i'w gwylio y noson honno.
Pan gyrhaeddais yr oedd criw o lanciau yn gwneud eu ffordd tuag ataf.
"Lynda?" meddai un ohonyn nhw ac er imi gael fy nhemtio i ddweud, "Livingstone, I presume" y cyfan ddywedais oedd, "You must be Patrick"!
Yr oedd fel pe byddem yn adnabod ein gilydd heb hyd yn oed gael ein cyflwyno i'n gilydd!
Yr oedd y bechgyn eraill hefyd yn frwdfrydig iawn pan glywsant fy mod am ysgrifennu darn am y tîm a phawb yn awyddus i drosglwyddo pytiau o wybodaeth.
Ymhlith y bechgyn yr oedd gŵr byr o'r enw Charlie Bayliff yn wreiddiol o'r Alban ond wedi treulio dros ugain mlynedd yn Ne Affrica.
Pan ddywedais mai Lynda o Gymru oeddwn meddai: "Synnwn ddim taw Jones ydy chi felly."
Ac yr oedd wedi taro'r hoelen ar ei phen ac eglurais fy mod yn briod â Groegwr a'm cyfenw bellach yn Ganatsiou.
Ond dyn a ŵyr beth a glywodd o gan iddo fy nghyflwyno i'r tîm fel Lynda Gandhi!
Busnes addurno
Yr oedd croesdoriad diddorol yn y tîm. Dyn o'r enw Steffan Morris na chollodd ddim amser cyn ddweud taw Cymro oedd ei dad yn wreiddiol.
Roedd Steffan ei hun wedi ei godi yn Lloegr ac erbyn hyn wedi priodi Gwyddeles o Ddulyn, Karen, a chanddynt fab deg oed.
Daethant draw i wlad Groeg i roi cynnig ar weithio bum mlynedd yn ôl a chael blas ar y ffordd arall o fyw sydd yma.
Erbyn hyn maent wedi sefydlu busnes addurno adeiladau a moderneiddio hen lefydd.
Tîm merched
Yr oedd Karen yn ymarfer gyda'r chwaraewyr ac erbyn inni fod yn siarad am dipyn yr oedd wedi fy ngwahodd innau i ymuno â'r tîm! Ond yr oedd hynny cyn imi ddweud wrthi fy mod yn rhy hen!
Eglurodd ei bod hi yn ymarfer yn y gobaith o fedru codi tîm i fenywod ac er mai dim ond tair merch sydd â diddordeb ar hyn dywed ei bod yn hyderus y bydd digon i gael tîm cyflawn yn y dyfodol agos.
Wrth sgwrsio'n hwy dysgais i Steffan fod yn Ymladdwr Rhufeinig ar y teledu.
 Cyn ffarwelio a'u gadael i fynd ymlaen â'u hymarfer fe roddodd y ddau wahoddiad imi fynd i dafarn Wyddelig Mulligans Mill yn y dref.
Hwy fu'n gyfrifol am addurno'r lle a dyma fan cyfarfod y tîm am beint wedi ymarfer.
Gêm mor ddieithr
Er i glwb Spartakos, Thessaloniki, fod yn rhedeg yn swyddogol ers 2000 eglurodd Babis Demertzis, y llywydd, ei bod yn anodd denu bechgyn ifanc gan fod y gêm yn un mor ddieithr iddyn nhw.
Fodd bynnag, mae Undeb Rygbi Groeg yn gorff chwaraeon swyddogol ers Mawrth 2003.
Ar hyn o bryd tri o dimau sydd yma yng Ngroeg, yr Attica Springboks, Teirw Corinth, a Spartakos o Thessaloniki, a'r rheini'n chwarae'i gilydd yn rheolaidd a chystadlu yn erbyn timau o dramor sy'n ymweld â Groeg.
 Yn ogystal mae yna dîm profiadol dros 35 oed ar fin cofrestru.
Mae'r Adran Datblygiad Ieuenctid yn cynnal sesiynau dwyawr bob Sadwrn yn Athen ac yn trefnu seminarau i hyfforddwyr ysgolion preifat y brif ddinas yn gyson gyda'r bwriad o gyflwyno'r gêm i'w gweithgareddau ysgol.
Trefnir cystadlaethau saith bob ochr i ieuenctid ac oedolion. Yn Thessaloniki y bu'r rhain eleni.
Yn anffodus i dîm Athen, ni chaniatawyd cae porfa hyd yn hyn ac o'r herwydd ni allant chwarae gêm gywir yn ystod eu sesiynau ymarfer.
Mae gan dimau Thessaloniki a Chorinth gyfleusterau iawn fodd bynnag diolch i haelioni a chefnogaeth cynghorau lleol.
Mae cynlluniau ar y gweill, fodd bynnag, i gael lle parhaol yn Athen.
. Heb dorri calon
Cymerodd Spartakos ran mewn cystadleuaeth yn Bwlgaria ddechrau Mai ond oherwydd diffyg profiad aflwyddiannus fuo nhw ond diolch i anogaeth Charlie Bayliff dydyn nhw ddim wedi torri'u calon .Cael eu siomi wnaeth timau Groeg mewn twrneimant yma yn Thessaloniki hefyd ond hwarae teg iddynt, mae eu brwdfrydedd yn parhau ac yn dilyn cyhoeddusrwydd yn y papurau newydd ac ar deledu lleol mae'r bêl hirgron yn dechrau ennill tir!
Gêm ryngwladol gyntaf!
Yn dilyn y twrneimant yn Thessaloniki ddiwedd Mai cyhoeddwyd fod Groeg yn mynd i ymuno â'r deugain ac un o aelodau eraill Undeb Rygbi Ewrop yn yr hydref a brwydro am deitl y bencampwriaeth.
Y cwestiwn yw, pwy ddewisir i gynrychioli Groeg? Hon fydd y gêm ryngwladol gyntaf erioed i dîm cenedlaethol Groeg.
Cyhoeddwyd mai yn nhrydedd adran Cwpan y Cenhedloedd Ewropeaidd y byddwn yn cystadlu ymhlith gwledydd fel y Ffindir, Monaco a Slofacia gyda'r gêm agoriadol ar Hydref 22 yn Slofacia a thîm Slofacia yn ymweld ag Athen ar Dachwedd 5.
Bydd yr enillwyr yn wynebu enillydd y gemau rhwng y Ffindir a Monaco.
Y cam nesaf i Undeb Rygbi Groeg ydy dod o hyd i hyfforddwr i droi nifer o chwaraewyr o wahanol glybiau yn chwaraewyr cenedlaethol!
Yr ymgeisydd tebycaf ydi'r Sais, Kevin Green a fu'n chwarae i Bedford ond sy'n awr yn hyfforddi tîm Athen.
Pwy gaiff chwarae?
Ond nid yn unig bydd angen hyfforddwr - bydd yn rhaid penderfynu hefyd pwy fydd yn gymwys i chwarae.
Dan reolau'r Bwrdd Rygbi Rhyngwladol gall unrhyw un sydd wedi byw yn y y wlad am dair blynedd chwarae drosti - ond, yn anffodus, mae rheolau Groeg ychydig yn llymach.
Ond ni ellir dirnad cael tîm o ddim ond Groegiaid ac fe fyddai hynny'n annheg a'r tramorwyr sydd wedi gwneud cymaint i hyrwyddo'r gêm hyd yn hyn yn eu gwlad fabwysiedig. Os y byddant yn gymwys dan reolau'r Bwrdd Rhyngwladol byddant yn siŵr o gael eu hystyried debygwn i.
O wledydd eraill
Efallai y bydd yna symudiad tuag at gael chwaraewyr Groegaidd mewn gwledydd eraill yn ôl fel Nick Alamanos sy'n chwarae i Walsall, Lloegr.
Un arall ydy Dinos Alexopoulos - bwystfil o ddyn ac Adonis a fu yn ysgol Millfield ac yn chwarae i'r Harlequins yn Lloegr.
Yn anffodus, bu allan o'r gêm am rai blynyddoedd ond credir ei fod ar fin ymuno â thîm Richmond y tymor nesaf.
 Byddai'n wych pe gallai ei wlad, elwa o'i brofiad ar gychwyn ei hynt ym myd y bêl hirgron.
Ar y llaw arall, mae na nifer o Roegwyr mewn ysgolion a phrifysgolion ym Mhrydain ac mewn gwledydd fel Awstralia a De Affrica.
! Yn sicr mae yna deimlad fod pobl yn blino rhywfaint ar bêl-droed a chwaraeon eraill ac yn chwilio am ddiddordeb newydd.
Dyfal donc a dyr y garreg.
Pwy a ŵyr efallai ymhen rhyw ugain mlynedd y bydd Groeg yn ddigon da i guro'r Cymru !
|
