Y ffordd draddodiadol o baratoi wyau ar gyfer y Pasg yma yng Ngwlad Groeg ydy eu lliwio'n goch.
Eleni, fodd bynnag, roedd rhai o'r cwmnïau sy'n paratoi yr amlenni yn cynnwys powdr o wahanol liwiau, wedi mynd gam ymhellach ac yn gwerthu math o stampiau i'w rhoi am ganol yr wy.
Yn naturiol, 'roedd hyn yn apelio at y plant gan mai cwningod bychan oedd ar y rhan fwyaf ohonynt.
I mi, er hynny, roedd y gwir ystyr wedi ei golli ar draul ffasiwn a masnach!
Pan welais y rhain yn cael eu hysbysebu ar y teledu credais mai rhodd oddi mewn i'r amlen gyda'r lliw oedd ond wedi cyrraedd y siop deallais fod yn rhaid prynu'r amlen yn cynnwys y rhain ar wahân.
Felly, ffordd o wneud ychydig o arian oedd hyn yn unig ac wrth gwrs nid yw ond yn naturiol i gwmnïau geisio trefnu rhywbeth gwahanol gan fod y gystadleuaeth rhyngddynt yn un mor frwd.
Patrwm prydferth
Yn nhref enedigol y gŵr y treuliais i'r Pasg eleni ac un o'r pethau a wnaeth argraff arnaf yno oedd y ffordd roedd un o'i gyfnitheroedd wedi addurno ei hwyau gan greu patrwm prydferth iawn arnynt.
 Dywedodd wrthyf mai'r gyfrinach oedd treulio rhywfaint mwy o amser yn eu paratoi nag a wneir gyda'r rhai traddodiadol.
Defnyddiodd fflos, math o wlân arbennig, a hwnnw o wahanol liwiau.
Gyda'r rhai cyntaf defnyddiodd fflos glas, pinc a phorffor.
Torrodd ddarnau bychain o'r fflos, a'u gludo ar blisgyn yr wy gyda dafn o ddŵr cyn eu rhwymo mewn ffoil arian.
Y cam nesaf oedd eu berwi.
Defnyddiodd liw glas yn hytrach na'r coch traddodiadol fel y byddai'n addas i liw y fflos a ddewisodd.
Eglurodd y byddai rhywfaint o'r lliw glas yn y sosban yn gollwng drwy'r ffoil a gadael lliw glas o ben i ben, a'r darnau o fflos wedi argraffu arno.
Mwy ysblennydd
Roed yr ail ddull ychydig yn fwy cymhleth a'r canlyniadau yn llawer mwy ysblennydd a'r rhain a dynnodd fy sylw i yn bennaf.
I greu'r effaith glynodd ddarnau bychain o risgl winwn ar yr wyau a'u dodi un ar ôl y llall yn dynn mewn hen hosan a dodi honno mewn sosban o hylif gwyrdd tywyll.
Crëwyd patrwm rhagorol ar blisgyn yr wyau ac fe fyddaf innau yn siŵr o geisio gwneud hyn y flwyddyn nesaf.
Dwy arddangosfa
Arwydd o ddeffroad y gwanwyn yw'r wy ac o ailenedigaeth Crist yn y diwylliant Cristionogol.
 Yn sgil hynny agorwyd dwy arddangosfa; un yn Athen, Wyau Pasg addurnedig y byd gyda'r rhan fwyaf ohonynt wedi eu casglu gan ddyn o'r enw Papageorgiou, a fu'n casglu wyau ers deugain mlynedd nes bo ganddo erbyn hyn 1,500 o wyau o 130 o wledydd.
Yn Thessaloniki bu arddangosfa Hanes yr Wy.
Sut gall wy sy'n cael ei ddodwy gan aderyn mor wylaidd a'r iâr fod yn destun i ddychymyg cymaint o athronwyr, ysgrifenwyr, beirdd, gwyddonwyr, mathemategwyr, peintwyr, cerflunwyr, cynllunwyr, penseiri, casglwyr gwrthrychau heb anghofio ffotograffwyr?
Daeth y cwestiwn llosg i'm cof; Beth ddaeth yn gyntaf, y cyw ynteu'r wy?
I geisio datrys y cwestiwn rhaid oedd ymweld â'r arddangosfa yn Amgueddfa Celf Cyfoes Macedonia.
Roedd yno luniau diddorol a dynnwyd gan ddau ffotograffydd ac yr oedd nifer o wyau cain yno; rhai o blastr ac wedi eu peintio gan arlunwyr o dref Thessaloniki.
Dewis symbolau
Dewisodd y rhan fwyaf o'r arlunwyr addurniadau yn cynrychioli symbolau ac agweddau yn ymwneud â phleserau bywyd, diogelwch, ffrwythlondeb neu hyd yn oed alwad i'r grymoedd cyfrin sy'n dal i fod yn rhan o grediniaeth boblogaidd.
Gynt, fe fyddai pobl yn rhoi wyau addurnedig adeg y Pasg yn ogystal ag ar ddydd eu henwau (sy'n bwysicach na dydd eich pen-blwydd yn y wlad hon), neu adegau pwysig bywyd fel priodasau.
Pwy a feddyliai y byddai'r wy wedi ennill y fath bwysigrwydd heb sôn am fod yn ysbrydoliaeth i lawer o arlunwyr?
|
