³ÉÈËÂÛ̳

Wedi Efrog Newydd
"Rydym ni'n gweithio'n agos iawn gyda'r eglwysi a'r capeli a'r ffyddoedd gwahanol ac ar ôl beth ddigwyddodd yn Efrog Newydd saith mlynedd yn ôl roeddem wedi ffurfio'r fforwm rhwng y ffyddoedd a dwi'n meddwl mai dyna un o'r pethau gorau rydym ni wedi wneud fel Cynulliad," meddai.

"Yr ydw i'n cofio'r Archesgob Rowan Williams, Archesgob Cymru ar y pryd, yn dweud ei fod yn ddatblygiad pwysig dros ben achos lan at i ni ffurfio y fforwm doedd ef ddim ar restr - a doedd neb arall ar restr - rhifau teleffon y ffyddoedd gwahanol yng Nghymru fel tase rhywbeth yn tasgu mâs o ryw gasineb rhwng pobl o ffydd gwahanol fydden nhw ddim yn gallu ffonio'u gilydd ar frys er mwyn dweud , 'Rydym ni'n gorfod tawelu pethau i lawr, beth allwn ni wneud, allwn ni gyfarfod?'" meddai.

Dywedodd iddo ymuno â gŵyl Diwali - gŵyl goleuni a chyfoeth yr Hindwiaid - oherwydd ei deimlad ei bod yn bwysig dathlu gwyliau gwahanol rannau amrywiol o'n cymdeithas.

Traddodiadau eraill
"Oherwydd yr eironi mawr am Gymru yw bod yna ar un ochr hen ddiwylliant a threftadaeth gyda ni ac yr ydym yn ymfalchïo yn naturiol - yn enwedig ar ôl datganoli - ein bod ni'n gyfrifol am edrych ar ôl yr hen dreftadaeth , yr iaith a'r Eisteddfod, llenyddiaeth a chanu yn y steil Gymreig a Chymraeg ac ar yr un pryd rydym yn gorfod cofio mai gwlad gosmopolitanaidd yw Cymru achos bod y chwyldro diwydiannol wedi dod â phobl o bob cormel o'r byd i mewn i Gymru," meddai.

Nid yn 'ddyn crefyddol'
Ond dywedodd na fyddai yn disgrifio ei hun fel "dyn crefyddol":
"Fe gefais i gefndir cryf iawn yng nghapeli Caerdydd a gwaelod y garth ac Ynys Tawe . . . ac maen nhw'n parhau i ddylanwadu arnaf fi [ac] yn rhan o nghefndir ac yn rhan o'r pethau sydd wedi ffurfio fy holl safbwynt a'm safiad i tuag at gymdeithas - ond dydw i ddim yn un sy'n grefyddol nawr," meddai.

"[Ond] dydw i ddim yn erbyn crefydd," ychwanegodd.

Pwysleisiodd yn ystod y sgwrs bwysigrwydd creu dealltwriaeth rhwng dilynwyr gwahanol draddodiadau a chrefyddau gan ddweud ei bod yn bwysig galluogi lleiafrifoedd ddod at ei gilydd "er mwyn dathlu ac er mwyn dangos balchder ac er mwyn dangos nad ydyn nhw'n mo'yn colli y traddodiadau yna er eu bod nhw'n byw nawr mewn lle ac mewn gwlad arall," meddai.

Croesawu
"A beth sy'n bwysig i ni yw i ddweud wrthyn nhw ein bod ni'n croesawu'r ffaith eu bod nhw'n cadw eu traddodiadau diwylliannol a chrefyddol a ieithyddol ochr yn ochr â'n cymdeithas ni - bod y lleiafrifoedd a'r mwyafrifoedd yn gallu gweithio er mwyn ffurfio cymdeithas . . . sydd yn iach oherwydd bod pawb yn parchu ei gilydd," meddai.