Erthygl arall gan Sian Elin, yn son am ei bywyd newydd hi a'i gwr, Iolo ap Dafydd, Gohebydd Ewrop 成人论坛 Cymru, ym Mrwsel
 Teithio, gwasanaeth rhad a'r gobaith o gadw reiat
Mae'n rhaid cyfaddef fy mod wedi cael pwl o hiraeth i weld teulu a ffrindiau yn ddiweddar, felly doedd dim amdani ond pacio bag ac estyn am y pasport.
Gan mai penwythnos yn unig oedd gen i, byddai'n ddelfrydol hedfan i Faes Awyr Rhyngwladol Caerdydd felly dyma ddechrau ar y gwaith o holi am brisiau tocynnau i Gaerdydd a Bryste.
A'r canlyniad roedd pris y ffleit yn ddrutach i Gaerdydd ac roedd llai o awyrennau yn teithio'n ddyddiol o Frwsel yno felly dyma droi at Faes Awyr Bryste.
Roedd y teithio yn fwy cyson a'r prisiau'n rhatach - felly Bryste amdani!
Dagrau'r plant
Wrth ddweud fy ffarwel roedd dagrau'r plant yn gwmwl o euogrwydd dros fy mhen.
"Mam paid â mynd pryd wyt ti'n dod nôl? ti YN dod nôl?"
"Ydw wrth gwrs byddai nôl cyn pen dim!"
"Beth wyt ti'n mynd i wneud hebddo ni?"
(Mmm joio, cael gwydraid o win, cysgu'n hwyr, dim sychu penolau, malu awyr gyda ffrindiau, trio cadw reiat)
"Eich colli chi'n ofnadwy wrth gwrs!"
"Oce - cei di fynd ond cofia ddod ag anrheg nôl i ni."
Grêt - pwy faga blant?
Bargeinion diri
Wedi pasio drwy'r mannau angenrheidiol heb gael fy holi neu fy amau - mae edrych yn betrusgar mewn maes awyr yn wendid - dyma fi'n setlo ar yr awyren.
Dechreuais feddwl am y cwmniau sy'n cynnig gwasanaeth rhad, cwmnïau fel Go, Ryanair ac Easyjet.
Mae'r Gwyddel Michael O'Leary sy'n berchen ar gwmni Ryanair wedi agor swyddfa yn Charleroi sydd tua 40 km y tu allan i Frwsel ac mae bargeinion diri i'w cael.
Ydi'r teithiwr cyffredin yn mynd i dalu £500 i deithio ar awyrennau BA neu Lufthansa, neu £200 i deithio ar ffleits-dim-ffrils Ryanair.
Mae athrawes yn ysgol y plant wedi hedfan i Glasgow o Charleroi am £5 ar Ryanair!! Pris galwyn o betrol!
Yn aml mae'r cwmnïau yma yn defnyddio meysydd awyr llai blaenllaw, er enghraifft hedfanodd yr athrawes i Prestwick ger Glasgow ac mae ffleit Ryanair i Baris yn glanio yn Beauvais sydd tua 80 km i'r gogledd o'r brifddinas.
Ond mae teithwyr yn cael cynnig mynd ar fws arbennig sydd yn mynd â nhw i ganol y brifddinas. Hawdd a rhad!
Mae cwmni Go wedi agor desg ym maes awyr Bryste dyma ffactor sy'n siwr o ddenu nifer yno gan gynnwys Cymry o'r de a'r gororau mae Bryste yn elwa tra bo Caerdydd yn colli.
Trenau effeithiol a chyflym
Cystadleuaeth fwya' y cwmnïau yma yw'r trenau intercity, mae teithio ar drên yn Ffrainc, yr Eidal a'r Almaen yn rhad, effeithiol a chyflym.
Tan tua phum mlynedd yn ôl roedd teithio rhad o fewn Ewrop yn golygu 'pecynnau gwyliau' gyda phawb yn cael eu gwagu i gorlan gyfyng a'u trin fel defaid.
Ond, bellach, gyda gwasanaeth cwmnïau fel Easyjet - sydd gyda llaw yn derbyn dros 90% o'r trefniadau dros y we, sef yr ucha' yn y diwydiant - mae rhyddid gan y defnyddiwr i greu pecynnau unigol wedi'u teilwrio'n arbennig i ofynion y teithiwr.
Mae hyn yn rhywbeth sy'n ddeniadol i bob oedran mae Dad hyd yn oed yn giamstar ar drefnu teithiau dros y we!
Wedi taith tua 50 munud, glaniodd yr awyren a byddwch yn falch o glywed nad oeddwn am ddilyn arferion y Pab a chusanu'r ddaear falle yng Nghaerdydd ond yn sicr ddim ym Mryste!
Hedfanodd y penwythnos, gwelais ffrindiau, cymdogion a theulu a chefais ambell wydred o win ond yn lle cadw reiat, chwynais yr ardd.
Henaint ni ddaw ei hunan.
Enwogion Belg
Gyda llaw dwi'n dal i geisio darganfod pwy yn union yw deg mab/merch enwoca' Gwlad Belg - oes rhywun yn gallu fy helpu?
Oes rhaid iddynt fod yn gig a gwaed neu a ydi Hercule Poirot a Tintin yn cyfri??!!
|
