³ÉÈËÂÛ̳

Yn y lle cyntaf, tydw i ddim yn berson sy'n gallu gorffwys a mwynhau dan orfodaeth. Yn wir, mae teimlo pwysau i wneud hynny yn creu mwy o dyndra ynof na fyddai lastig thong maint 8, petai Siôn Corn wedi'i gyflwyno'n anrheg Dolig i Ann Widdicombe. Sut mae disgwyl i rywun ymlacio a joio mewn difrif calon, ar ôl bod yn rhedeg fel iâr Dolig wedi torri'i phen ers wythnos neu ddwy neu dair?

Ac oes yna unrhyw un heblaw amdanaf i sy'n credu bod y siopau mawrion yn ein hwrjo i brynu pethau mwy dwl a mwy diwerth o'u trobyllau tag bob blwyddyn? Faint o bobl ar eich rhestr Nadolig chi fyddai wedi syrthio ar becyn yn cynnwys yr oll sydd angen ei wybod arnoch am folddawnsio fel petai'r pecyn hwnnw'n cynnwys y Greal Sanctaidd ei hun? Na, toedd yna fawr o'r rheini ar fy rhestr innau chwaith.

A beth am sebon? A hylif ar gyfer y bath neu'r gawod? Peidiwch â nghamddeall ¬mi fyddaf wrth fy modd yn derbyn anrheg sy'n cynnwys 'ogla neis'. Ond bellach nid mater o ddewis rhwng arogl rhosyn, neu lafant, neu jasmin ydi hi. Erbyn hyn mae'r hylifau hyn yn hawlio'r gallu i'ch egnioli, i'ch bywiogi neu eich ystwytho, ymysg rhestr ddi-ben-draw o rinweddau eraill.

Ond be fyddai'n digwydd petaech yn cymysgu'r hylif sydd am eich egnioli a'r hylif sydd am eich ystwytho? A fyddech yn teimlo'r un fath yn union ag yr oeddech cyn cychwyn? Neu beth petaech yn cymryd joch o'r hylif sydd am eich bywiogi gymysgu a joch o'r hylif sydd am ei egnioli? A fyddech yn medru stwffio twrci, plicio'r tatws, gwneud y mins pei sgwennu'r cardiau ac addurno'r goeden ar eich union? A rhoi pas i Rwdolff ar eich cefn a chanu Teilwng yw'r Oen mewn pedwar llais ar yr un pryd? Rydw i wedi gweld tyrrau o focsys a thuniau siocled yn ymestyn at y nenfwd yn y siopau mawrion. A siocled wedi'i lunio'n bob math o siapiau - siapiau na fyddech byth yn dychmygu y byddai'n bosib eu creu o siocled (a nifer ohonynt yn siapiau rhy bowld o lawer i'w crybwyll mewn cyfnodolyn parchus fel hwn). Ac am y fraint o fwyta siocled siâp (llanwch y bwlch fel y mynnwch!) talu o leiaf ddeg gwaith gymaint ag am far o siocled cyffredin cysurlon.

Ar y dydd Mawrth ar ôl Dolig, wedi danfon y ferch i'r stesion, piciais i un archfarchnad (nid yr un fawr newydd sbon danlli sgleiniog - mae pasio honno yn y car yn dod a mi at gyrion nyrfys brecdawn) i nôl manion angenrheidiol megis llefrith a phapur tŷ bach. A choeliwch neu beidio, roedd un silff gyfan yno'n llawn dop o fwydydd Weight Watchers. la, erbyn 27ain Rhagfyr roedd un o'r siopau oedd am ein gweld yn bwyta dros Gymru yr wythnos gynt, nawr am i ni lenwi'n cypyrddau a bwydydd brwydro bloneg.

Ai fi ydi'r unig un, ynteu oes na rywun arall allan yn fan'na'n rhywle sy'n credu ei bod wedi colli'r plot ynglŷn â'r Nadolig? Efallai mai'r peth callaf i mi ei wneud fyddai gaeafgysgu gyda'r anifeiliaid. Efallai y gwnaf i ddechrau rŵan - mi fyddwn i'n cael rhyw ddeufis go lew cyn y gwanwyn, a siawns gen i y byddai hyd yn oed sbarion mwyaf sbâr y tomenni tat (heb son am y treiffl twrci, a'r black forest twrci, a'r sgons twrci a'r . . . ) wedi diflannu erbyn hynny.

Ond cyn i mi fynd ati i lenwi fy mhotel dŵr poeth. Blwyddyn Newydd Dda i chi i gyd!

Diolch i Janice Jones am yr erthygl hon -Gol