³ÉÈËÂÛ̳

Bellach mae'r copïau cyntaf wedi gadael y wasg ac o fewn y mis nesaf bydd y deuddeg llyfryn am anturiaethau amrywiol Ceri a Huw yn cyrraedd pob ysgol gynradd yng Nghymru.

Mae disgyblion Ysgol Llanllechid wedi mwynhau darllen am Ceri, Huw a'r ci drwg ers nifer o flynyddoedd bellach, ac wrth eu boddau'n trafod y darluniau a darllen y storïau. Cawsant gyfle i actio'r cymeriadau mewn sawl sioe, canu'r caneuon, a pheintio lluniau Ceri a Huw.

Profwyd yn Ysgol Llanllechid, fod y storïau nid yn unig yn boblogaidd gyda'r plant a'u rhieni, ond hefyd yn llwyddiannus iawn fel cymorth i ddysgu iaith yn ei holl agweddau, yn nosbarthiadau'r Babanod.

Mae'n debyg mai llwyddiant y llyfrau yw eu symlrwydd - mae'r storïau'n fyr, y darluniau'n lliwgar, a dydi'r brawddegau ddim yn gymhleth. Mae'r eirfa sy'n y llyfrau wedi dod o 'fyd' plentyn.

Dydi'r llyfrau ddim ar werth yn y siopau eto, ond fel tamaid i aros pryd - gallwch weld perfformiad o 'Coeden Nadolig Ceri a Huw' gan blant Dosbarth Derbyn Ysgol Llanllechid ar 10 Rhagfyr.

Noddwyd y cyhoeddi a'r dosbarthu gan yr Asiantaeth Sgiliau Sylfaenol a chefnogwyd y fenter gan Gyngor Gwynedd. Gwasg y Bwthyn fu'n gyfrifol am yr argraffu, ac maent i'w canmol yn fawr am ddiwyg hyfryd y llyfrau.

Llongyfarchiadau i Mrs Marian Jones am ei champwaith!